أم كوكو: تقوية مناعة الأطفال بطرق طبيعية

بقلم: 

أنا بكره الشناء, بارد مفيش شمس موسم المرض وطبقات الهدوم اللي فوق بعضها و احتياطي لبس كوكو واحنا خارجين بدل ما كان فستان كات بقي فانلة وبلوزه و بنطلون و جاكيت ولسه الطبقات حتزيد كل ما نشتي اكثر, فقرة الألعاب المائية في البانيو اتلغت وأسوأ حاجة الشتا دخل علينا بحتة دور برد من أسوأ ما يكون أول مرة كوكو تتبهدل كدة , قطعت في قلبي المجرمة وأسقط في يدي

صحيح كوكو متابعة مع دكتور ممتاز هادي جدا في الأدوية و مابيفتريش زي معظم الدكاترة اللي للأسف دلوقتي بيستسهلوا الأدوية و الأنتيبوتك بشكل مؤذي لمناعة البابي بس انا كنت محتاجة اسمع كلام من أم زيي مرت باللي مريت بيه و عندها خبرة ازاي تساعد ولادها يخفوا اسرع و تقوي مناعتهم بعيدا عن الأدوية.

التدوينة دي و اللي بعدها حنقل لكم خبرة أمهات غيري في كيفية تقوية مناعة البابيهات و الأطفال مع دخول المدارس و بداية الشتاء و ازاي تستخدمي منتجات طبيعية و أعشاب في القضاء علي البرد في أوله أو مساعدة الدواء اللي بياخده ابنك عشان يخف بسرعة

أم أمريكية عندها 7 أولاد مطعمتش حد فيهم للبرد و أعتمدت علي الطرق الطبيعية في تقوية مناعة أولادها, كانت مؤمنة بإن ولادها لازم يتعرضوا للميكروبات عشان جهازهم المناعي يطور و يكون دفاعاته الطبيعية و طبعا كان بيجي لهم برد عادي و يسخنوا زي كل الأطفال لكن كانوا بيخفوا أسرع و من غير مضاعفات

كانت معتمدة في النظام بتاعها علي شوية حاجات منها

1-      الرضاعة الطبيعية:

علي أساس ان لبن الأم أساسي في تكوين الجهاز المناعي للأطفال وغالبا الأطفال اللي رضعوا طبيعي أقل عرضة للعدوي و بياخدوا التغذية المناسبة اللي فيها الأحماض الدهنية الأساسية للجسم

الأمهات اللي مقدروش يرضعوا طبيعي الأم دي بتنصحهم بلبن الأرز البني كبديل غذائي صحي يساعد علي تكوين مناعة طبيعية

2-      وفري نظام تغذية صحي

القاعدة في الأكل اللي بتقدميه لأبنك ان كل ما كان طبيعي أكثر و أقل عرضة للمعالجة وإضافة النكهات له كلما كان صحي و غني بالفيتامينات و المواد الأساسية لبناء جهاز مناعي قوي.. نظام غذائي معتمد علي الفواكة والخضروات والمكسرات والبقوليات والحبوب الكاملة

الأطفال بيتشدوا للوجبات الخفيفة " سناك" اللي بتبقي غالبا مليانة بالسكرو مرت بمعالجات كثيرة افقدتها قيمتها الغذائية , المنع مش الحل السليم و لكن وفري دايما بدائل صحية معمولة في البيت زي العصائر الطبيعية والسموثيز وسلطة الفواكة والمكسرات المحمصة والكيك البيتي

لا يمكن تعودي ولادك علي نظام غذائي و إنت مش ملتزمة به, دايما حطي نفسك كمثال يحتذي به لأولاد

3-      لو ابنك يعاني من حساسية أو اشتباه في حساسية لازم تعيدي النظر في نوع الأكل اللي بتقدميه, الأكل الزيتي والمخبوزات والسكريات و الصودا ممكن يخلوا الأمور أسوأ, برضه لازم تحددي من كميات الفواكه المقدمة له والسلطات ومنتجات القمح والخل والصويا ,مفيد تقدمي له الخضروات الحلوة زي القرع والجزر والكرنب والبصل

4-      اخلقي بيئة غير سامة

تعرض الأطفال للمواد الكيماوية بيدمر جهازهم المناعي, مع ان كل حاجة حوالينا مصنعة من كيماويات يمكنك توفير بيت صحي زي شراء ادوات نطافة غير سامة ومنتجات العناية بالبشرة وألياف طبيعية في المراتب والمفروشات والخضار و الفواكه المزوعة بسماد طبيعي (اورجانيك)

تعليقي أنا أم كوكو : كتير مننا ممكن ميكونش عنده القدرة المادية أو مش متوفر له البدائل دي في مصر بسهولة بس ممكن نحاول نتصرف علي قدر المستطاع علي قد امكانيتنا

5-      تجنبي المضاد الحيوي والتطعيم قدر المستطاعتعليقي  علي النقطة دي بالذات إن فعلا في تهريج في استخدام المضاد الحيوي ومعظم الدكاترة للأسف بيستسهلوا أما التطعيم فمختلف عليه فيه اراء علمية محترمة بتقول ان مهما طعمتي ضد أمراض مختلفة دا مابيأثرش علي جهاز المناعي للأطفال خصوصا ان في اتجاه في مصر بعدم الالتزام بالتطعيم اللي وزارة الصحة بتقدمه والعيادات الخاصة بتوفر تطعيمات تانية ضد فيروس الروتا و الانفلونزا .. مع اني اكتفيت بتطعيم وزارة الصحة بس مش شايفة ان التطعيمات التانية مضرة

أما رأي الكاتبة ان حقن التطعيمات الكثيرة للأطفال و هم لسه جهازهم المناعي بيتكون بيضغط علي الجهاز المناعي مما قد يؤدي الي خلل وظيفي فيه يعاني منه أطفال كثير

6-      حياة اسرية مستقرة الحب و الاهتمام بيقوا المناعة و الاطفال اللي بينموا في جو أسري مستقر ومحب بيحسوا بالأمان والسعادة و بيبقوا أقل عرضة للأمراض

تعليقي ان أيوة فعلا الزعل بيعي و أنا أول واحدة لما بزعل بعيا علي طول و لازم علي طول يبقي في تلامس بينا و بين ولادنا وأحضان وبوس ولعب حتي لما يكبروا مش و هم أطفال بس

7-      الروتين اليومي جزء من الاستقرار و دا يشمل الوجبات في مواعيد ثابتة, نوم الضهر و بليل و العيلة تاكل كلها مع بعض مهم جدا للأستقرار النفسي –

تعليقي: للأطفال ما قبل المدرسة في مدرستين في التعامل, مدرسة الروتين اليومي و مدرسة حسب الطلب جربت مع كوكو الاتنين و مدرسة الروتين اليومي علي قد ما بتقيدني في الحركة والمواعيد علي قد ما لاحظت ان كوكو نومها و شهيتها بيتظبوا و أنا بحس اني بني أدمة مسيطرة علي حياتي مش تحت رحمة مزاج كائن وزنه مجبش 10 كيلو

8-      النوم طبعا ضروري الطفل ياخد كفايته في النوم و ينام و يصحي في أوقات معقولة و ينصح بتخصيص بعض الوقت لسماع موسيقي هادئة أو أي نشاط هادئ يخفف من التوتر و يساعد علي الاسترخاء

9-      اللعب في أماكن مفتوحة – التعرض للشمس و الطبيعة و اللعب في الرمل والنجيلة عوامل محفزة لبناء مناعة قوية

تعليقي: فعلا العيال اللي بتتخزن في البيوت بتبقي صحتهم ضعيفة لازم يتعرضوا للشمس ولقذارة الشارع عشان عضمهم ينشف

دي نهاية تدوينة الأسبوع دا أما الأسبوع الجاي مع أم تانية حتشرح لنا هو ايه الجهاز المناعي و أزاي الأطفال بيعيوا و ازاي تحولي مطبخك لصيدلية طبيعية تساعدك في مقاومة أشهر الأمراض اللي بتيجي للأطفال

التعليقات

ولقذارة الشارع عشان عضمهم

غير موجودة الآن
صورة suzy taha
suzy taha

ولقذارة الشارع عشان عضمهم ينشف

أنا معترضة على هي النقطة ام كوكو ..لنو أنا بعرف ولاد كتير من اللي عم تقولي عليهن هدول بيمرضو اكتر بكتير من الأولاد اللي امهاتهن بخافو عليهن من الشارع

بس بقية المقال أكتر من رائع شكرا الك

بصي أنا مش دكتورة بس اللي

غير موجودة الآن
صورة Noha El Guindy (Om koko)
Noha El Guindy ...

بصي أنا مش دكتورة بس اللي اعرفه و اتربيت عليه إن الشارع عامل زي مبدأ التطعيم قدر قليل من الميكروبات الغير مؤذية لتقوية المناعة..بي. بعني انا اتربيت علي اللعب مع الجيران في الشارع و نقوم و نقع و ناكل من الأكل اللي وقع علي الارض بعد ما ننفخ فيه ...
عموما دي حاجة بتختلف من بيت لبيت و من بلد لبلد و في الاخر كل ام تعمل اللي هي شايفاه مناسب لولادها :) امال تبقي سوبر ازاي ;)

الموضوع ده بجد هايل وانا

غير موجودة الآن
صورة om omar. momtaz
om omar. momtaz

الموضوع ده بجد هايل وانا معاكى فى تربيت الشوارع ديه انا معنديش غير ابن واحد والحمدلله الشتاء عندنا من بدرى وفى يوم كان عيان قوى ومش قادر ياكل من الالتهبات التى فى فمه روحنا للدكتور ومستنين الدور بقى يلعب وياكل من غير ما يشتكى (اينعم بسكوت وهو هو اللى موجود فى البيت بس اكل )انا كنت هالغى الكشف وامشى وحسيت فعلا انه لازم يخرج ويلعب

بجد انتى عندك حق بس انا ابنى

غير موجودة الآن
صورة amany elnagar
amany elnagar

بجد انتى عندك حق بس انا ابنى دايما بالليل انه بتتكتم ومس بعرف السبب واكيد الرضاعة بتبقى صعبة علية جدا وفى ارق طول الليل
كتر اخد انتيبوتك بس والله مش بتجيب نتيجة
احنا فعلا لازم نركز على الحاجات الطبيعية اكتر من الكميكل
تسلمى ام كوكى الموضوع حقيقى هايل جدا

فعلا الاطفال نفسهم بتتفتح على

غير موجودة الآن
صورة sara ghulam abbas
sara ghulam abbas

فعلا الاطفال نفسهم بتتفتح على الاكل وهما بره البيت في الشارع او حتى لو عند امي او حماتي علشان هما برده بشر وبيزهقو من قعده البيت ونفسهم بتتسد ن الاكل وتغير الجو دايما ضروري لنفسيه الطفل وشهيته